چو گوشاں مہرنگ ایں پری ماتٰ
زاناں جہنمِ بیرءِ چہ قہر ؤظلماتٰ
لگیت ترا ونگٰ ماں پراھیں پہناتٰ
کپتگ ئے ھمءِ دنیاءِ مطلبٕ چاتٰ
پر وتئ جیندٕ حسّد ؤخواھشاتٰ
زر ڈلٰ ریچ ئے پہ بند ؤ تعویذاتٰ
چو نہیں بانوک کہ نشتگ کلاتٰ
سک منا بژنیں تئ جیند شاھاتٰ
یاد نبئے پیسری دھرانی نبیراتٰ
ساہ وتئ داشتہ پہ زار ؤ فریاتٰ
عادت ئے دائم پہ جنگُ ؤصلواتٰ
حتماًں نکرزئے پہ پُلیں سؤگواتٰ
پہڈ بندئے پہ وتئ ننگیں زاماتٰ
وت دلٰ ساڈائے وتئ ذات ذریاتٰ
ھچ نہ تُورس ئے چہ ٹیہ شہماتٰ
کہ فایدہ نیست ایں گُڈی ھیہاتٰ
چوں ترا کیتیں عیب پوت شاتٰ
کرد کِار دراھیں چو زال خیراتٰ
جُوست بکن مکران یلیں براتٰ
راجٕ چم سُہر گوں پُلوکیں ذاتٰ
تؤ شگان نإشتگ پہ وھد بانداتٰ
ظاھر أنت حیلہ چہ تئ شبیہاتٰ
نیں ترا أخلاق مثل چہ وت ذاتٰ
نئے مہر پہ قول مہمان حساباتٰ
ھچ نچارئے تؤ سیاد ؤ وت براتٰ
چہر وارتہ ھوشٰ پہ مطلبٕ ماتٰ
تُور واران ئے چو لوڈوکیں گواتٰ
زاناں کہ گِپتگ ئے پیرین کرامات
راج دوستی ھوشٰ تؤ زبہر وارتہ
ھست ترا بیہءِ چہ گَندھیں ذات
دیم پہ دیم ئے گوں کُلیں ساواتٰ
چالاک ئے مثل چو خالیگیں پاتٰ
اے چہ جودءِ پہ صبر ؤ برداشتٰ
کہ ھور إیں گوں تؤ دنیای مہماتٰ
بلہ سک تُرساں وش میاتک لاتٰ
کہ دؤردات آخر جُہل بُنیں چاتٰ
شــاعـر آسـکانی بلــوچ وتیـــں
